Pastor Tlurpu hi,Manipur state-a,Tamenglong biel sunga Zote khuoa pieng a nih a.A pieng hun hi hrietchieng a ni nawh.A chin lain Sartuinekah an hungin pema.Indopui Pakhatna(1914-1918) khan, Allied Forces hai thangpui dingin a fe veh a.Lekha tlawmte lo inchukta a ni leiin,Medical Corps(damdawi tieng) sin a zu thaw ve leiin ,hrietna tamtak a hung hawna,1918 kum bul khan an hung kir nawk a nih. A ruolhai kristien an lo ni tawl tah a.Ama khawmin Sep ni 13,1918 khan,Pathien thu a hung awi veh a.Ama zirtirtu/Tirko Damsuokin,’Ni 16in Tlurpu rawiin an suol an sim’, tiin an lo ziek a.
Damdawi tieng thil a hung hriet chu, a rawngbawlnaa khawm a tangkai pui em em a.Ama hin Meitei tawng a hriet leiin,lal kut-le-ke pawimaw a hung ni bawk a.Harna Runpui Sartuinekah a tlung lai khan, lal aiawin a lo inzin suol a.A um naw kar taka a ruolhai po povin Thlarau malsawmna a dawng chu an hnar em em el a.”Ka chang ve thei duoiin,”tiin mi hmaah a kun zawn zawn hlaka.A beisei angina a hung chang ve tah a.An khawlai fangnaah a pai vela,inhuoia a tlan lut leh,vawkpui te thuoi huoi deu a va tuok fuka!!!
Kum 1920 sung khan,rawngbawlna ding zawngin an vak suok ve hlak a.Lakhipurah Thingtinkim tieng hotuhaiin an hang ko ve leiin.June 1,1921 in Kohranin tawngtaiin an in thla ve a nih.A ruolhai-Kambuong,Sunro le Lera leh thlaruk sung Tirko sin an in chuk a.anni rawi hin,Pu Zosapthara(Rev Edwin Rowlands) kha an zui rawn bik a.Tripura tieng le Chittagong Hill Tracts tieng hmun tamtak an fang hlak a nih.
Meitei tawng thiem ani leiin,Kuokluongah hmun khuor dingin an tir a.Kum 1922 Jan thla khana sunghai le Kuokluongah an lut a.Meitei lai rawng a bawl sa bawk a.Rawng a bawl hlim lai chun,harsatna a tuok zeu zeu hlak.Kuongthluhau(Late Rev Thansei Buhril a pa) leh Tuisuoliena an fe tumin,khaw sungah an inluttir nuom nawh a.Khawhnawmah an riek a.A zingah Tupidawr tieng an feh a.Tuolpui,kuki khuoa a fe tumin,an lalpa lovai hung tlungin a in sunga lo um chu a hmuin a lung a sen em em el a.Tuithei a laka hei vuok a tum leh thingpumin a lo dang a,a vuok nawh a.Ni khat chu a naupa Sapkung a nuhmei Hemnu leh Ngente khuoah Pathien thu hril dingin an feh a.Ngente khuo mihai chun,an inriektir nuom nawh a.An pahni chun hla an sak phing leh an ngainuom a, an inriektir tah a.Pathien thu khawm an hril thei ta a.
Kum 7 lai rawng a bawl hnungin ,Kohranah buoina nasatak a hung tlung leiin,a lung a muong thei ta nawh a.Thawk khat tak chu,Pu Watkin Roberts pawl tieng a thang a,Indo-Burma Pioneer Mission hnouah a um ta lem a.Amiruokchu, Kohran buoina a hung sosang pei lei khan,a rawngbawlpui Pastor Kambuong leh Welsh Mission an hung bel a.Synodical Exam a pass ve leiin,Cachar Hiil Tribes Assembly (Synod) chun Jan 22,1939 khan , Gobolcherraah,pastor a hung ni ve tah a.Ringumtak le hlawtling taka kum 50 neka tam rawng a bawl hnungin,Oct ni 15,1981 khan Kumacherrah Mission Compound(Ramthim Hmunah) Lalpa kuomah a lo chawl ve ta a nih.
A mizie inchik tlakhai:
1.Piengpui lungril thatak nei,dawthei le zainem em em el a nih.Mi taima a ni bawk.
2.A Kristien hringnin sukhring zingtu le sukhrattu chu Krista tuorna thu a nih.Ni khat, a biel fang kir tiengah, Meitei dawr pakhat a chawl dingin a lut a.A dangchar chun,Saacrament a sem mahla a hang dawn chu a tap el tah a.”Pa,iengleia I tap am?” an ta.”Nangni chun hrie naw ti niu,”a ti pek ringawt a.Krista tuorna le a thisen suok kha a hei ngaituo suok a nih.
3.Mi bengvar le tlawmngai theitak a nih:
Inkhawmpui thlasiet thlak tak el,Jakradawr(Jakuradhar) a Jan ni 12-15,1922-a a um tum khan,Pastor R.Dala chu,Tupidawra nga a fak suol leiin,tuihriin a man a,Jakradawr tlung hmain pum chungah a thi el tah a.Paastor Tlurpu chu bawisawmtu takin a thang a.Tirko Damsuok le Tirko Lera’n an thangpui a,Tirko Tlurpu hin, a ruong chu Tuiruong kaia inthawkin khawsung chenah a puok kai a.kha tum khan,tuihri(Cholera) ti leiin,inkhawmpuia hung 200 vel zet an tlansie a nih.
